Un ciberataque contra os sistemas de refrixeración de varias cadeas de supermercados provocou incendios e perdas millonarias de alimentos en Francia, onde resultaron afectados centos de establecementos. A investigación apunta a posibles vulnerabilidades en equipos de control conectados a Internet e podería ter implicacións noutros países europeos, entre eles España.
Carrefour confirmou incidencias en 80 supermercados e Intermarché en arredor de 150, mentres que Monoprix rexistrou problemas no 5 % dos seus aproximadamente 490 establecementos franceses. Os sistemas afectados elevaron ata os 50 graos a temperatura de frigoríficos e conxeladores durante varias horas, o que obrigou a retirar os alimentos para evitar riscos sanitarios. O director executivo de Intermarché, Thierry Cotillard, estimou que as perdas poderían alcanzar decenas de millóns de euros nun só día.
A Axencia Nacional para a Seguridade dos Sistemas de Información de Francia (ANSSI) investiga o ataque por encargo do primeiro ministro, Sébastien Lecornu. Félix Aime, analista de Sekoia Threat Detection and Research, sinalou que tamén se rexistraron efectos en España, Portugal, Polonia, Alemaña e Bélxica.
As primeiras pescudas apuntan a vulnerabilidades en sistemas de xestión da refrixeración da empresa danesa Danfoss. Estes equipos permiten controlar a temperatura das instalacións a través da Internet e, segundo o fabricante, os dispositivos afectados empregaban versións antigas do firmware. A compañía lembrou a importancia de manter o software actualizado e substituír os sistemas obsoletos.
O pasado 9 de agosto, a firma de ciberseguridade Claroty publicara unha análise sobre vulnerabilidades no controlador Danfoss AK-SM 800A que podían permitir eludir os controis de autenticación e executar código nos dispositivos afectados. As actualizacións distribuídas polo fabricante abordaban estes problemas.
O incidente coincide con outro problema de seguridade comunicado pola neerlandesa Ahold Delhaize, propietaria da cadea Albert Heijn e de varias marcas de supermercados nos Estados Unidos. O grupo desconectou preventivamente algúns sistemas e suspendeu temporalmente os pedidos en liña, aínda que afirmou que non había motivos para relacionar os feitos co ataque en Francia.
