Xulio Ferreiro visitou as instalacións do CITIC

Este 22 de novembro o Centro de Investigación TIC da Universidade da Coruña (CITIC) recibiu nas súas dependencias a visita do alcalde da Coruña, Xulio Ferreiro, que estivo acompañado no seu percorrido polas instalacións do centro polo reitor da UDC, Julio Abalde, e o vicerreitor de Política Científica, Investigación e Transferencia, Salvador Naya.
Na visita institucional do rexedor coruñés tamén participou (mostrando as liñas de traballo do CITIC e o importante labor do seu equipo de investigadoras e investigadores), Manuel F. González Penedo, o director do centro, quen lle tamén lle transmitiu a Ferreiro as accións de transferencia tecnolóxica realizadas dende o mesmo (achados e proxectos de valor convertidos en produtos de mercado ou en ferramentas de produción).
Na primeira parte da visita, o alcalde tivo ocasión de coñecer as dependencias do edificio CITIC 2, que acubilla as empresas estratéxicas do sector tecnolóxico coas que o centro colabora e desenvolve contratos de I+D. Máis tarde, o alcalde visitou o laboratorio de usabilidade do centro, onde mostrou interese polo funcionamento desta plataforma de observación do uso de novas tecnoloxías no fogar dixital conectado.