Collen impulso, con apoio galego, un total de 19 proxectos fintech

Xa hai proxectos potencialmente acelérabeis na terceira edición do programa de startups de Abanca Innova: 19 iniciativas de España, Portugal e Suíza co nexo común da innovación e a arela por achegar recursos tecnolóxicos revolucionarios fintech. Os proxectos participaron os días pasados nun Bootcamp con charlas e sesións para axudar aos seus responsables a definir cadanseus modelos de negocio e, sobre todo, a desenvolver probas de concepto.
Nestas actividades participaron emprendedores referenciais como Eduardo Martínez García, fundador de Lum, app que ofrece ferramentas para cambiar a forma de ofrecer a banca comercial, ou Lorenzo García Tamarit, CEO de TheLogicValue.com, empresa de software financeiro.
Nas sesións tamén traballou Augusto Santos, director executivo (CEO) de Fintech Portugal, quen lles trasladou a súa visión sobre o ecosistema fintech en España e Portugal: a paisaxe peninsular onde se xuntan as novas tecnoloxías e a actividade financeira. Igualmente mostróuselles en detalle a experiencia innovadora de Abanca da man do director xeral de IT, José Manuel Valiño, e a directora de Mercadotecnia, Susana Ortiz.

O seguinte paso para as firmas participantes é, como dixemos, desenvolver as súas probas de concepto. Nunha semana, os proxectos que participaron no Bootcamp recibirán retroalimentación por parte da entidade financeira galega acerca da súa viabilidade. As propostas que sigan adiante pasarán a desenvolverse coa axuda do equipo de Abanca Innova e da empresa HubIN.
As propostas que concorreron no Bootcamp son as seguintes: Micappital, InvestSuite, Suscrip, ZM Algorithmic, OWE Money Manager, Finweg, Invisible Collector, Card dynamics, Lucas, NewRalers, Utrust, Infra, Iron Chip, Data XL, Pibisi, Gohu, LOQR, iCommunity e Imotion Analytics.