As axudas Conecta COVID de GAIN recibiron dúas ducias de propostas de transformación

A Axencia Galega de Innovación (GAIN) que dirixe Patricia Argerey fixo balance das propostas innovadoras aspirantes a beneficiarse do programa de axudas Conecta COVID, destinadas a impulsar a materialización de recursos, servizos e tecnoloxías, made in Galicia, con capacidade para afrontar os principais desafíos da pandemia. En total, recibíronse solicitudes para financiar 24 proxectos de investigación, desenvolvemento e innovación.
GAIN explica que 21 destas iniciativas están relacionadas coa investigación industrial e desenvolvemento experimental relacionado coa COVID-19, mentres que as 3 restantes enmárcanse no eido da innovación en produto ligada tamén a pandemia.
Nos 24 proxectos están implicadas 45 empresas galegas (das cales 40 son pemes e as outras 5 grandes empresas tractoras) e 10 organismos de investigación. A axencia salienta que “todos están orientados ao mercado” e “á mellora da competitividade das empresas galegas, contribuíndo ao mesmo tempo ao impulso da transición dixital do tecido empresarial galego e á súa recuperación”.
Exemplos concretos
Entre as propostas achegadas salientan, entre outras, sistemas de desinfección intelixente, aplicacións dixitais e de Intelixencia Artificial no diagnóstico e proxectos de desenvolvemento experimental para evitar a propagación do virus.
Todas teñen en común estar aliñadas cos obxectivos dos Hubs galegos de innovación dixital, Dihgigal e Datalife, ambos axentes colaboradores na convocatoria e desenvolvemento do programa de axudas que fomenta tamén a Estratexia de Especialización Intelixente (RIS3) de Galicia.
“A colaboración dos Hubs permitirá canalizar os fondos dun xeito eficaz e eficiente, xa que poderán orientar os apoios ás necesidades reais do tecido empresarial e avanzar no modelo galego de especialización intelixente”, sinalou a directora da Axencia Galega de Innovación, Patricia Argerey.
Ao mesmo tempo, destacou que “neste contexto de pandemia, a innovación e a transición dixital son máis necesarias que nunca para reactivar a economía, recuperar o emprego e garantir a prosperidade de Galicia”.
A Xunta de Galicia destina 4M€ a esta nova convocatoria Conecta COVID, coa que agarda mobilizar 6M€ grazas ao co-financiamento privado das empresas galegas. Así, a intensidade da axuda que recibirán os proxectos apoiados depende da liña e do tamaño das empresas implicadas, podendo recibir as pemes ata o 80% do total do investimento. Ademais, poderán realizarse pagamentos anticipados de ata o 80% da axuda concedida e incluso do 100% no caso de que as iniciativas rematen este ano ou en 2022.