En marcha o Museo Virtual da USC

Esta semana comezou oficialmente a súa andaina o Museo Virtual da Universidade de Santiago, posto en macha a través do programa Patrimonio Aberto da institución académica, que pretende “achegar os bens da Universidade á cidadanía”. O museo, activado logo de cinco anos de intenso traballo documental (implicou o inventariado de preto de mil bens inventariados aos que xa se pode acceder de balde), é “un proxecto aberto, vivo e en permanente evolución”. Ou sexa, irá ampliando de xeito progresivo os seus contidos.
O museo, que inclúe textos elaborados polo profesor da área de Historia do Arte, José Manuel García Iglesias, artéllase nunha serie de apartados, por exemplo Coleccións, que xunta unha escolma de cen pezas singulares, ou Explora, que é unha ferramenta de busca que permite acceder á totalidade dos bens, realizando procuras por título, autoría, data ou localización.
Coincidindo coa apertura deste museo en liña, este xoves 7 inaugurouse no Colexio de Fonseca a exposición A Minerva Compostelá. As súas glorias, parte tamén do programa Patrimonio Aberto e que mostra parte da historia da institución recreando espazos do pasado que seguen “presentes”.
O Museo Virtual da USC terá unha presencia singularizada na sancristía da capela a través de códigos QR alusivos ao que alí pode verse. “Xérase así un vínculo entre as potencialidades do virtual e o coñecemento directo das obras ás que se fai mención”, sinala a Universidade.
Este Museo Virtual, financiado pola Deputación da Coruña e deseñado por Uqui Permuy, conta con fotografías de Fuco Reyes e Santi Alvite.