Vodafone xa ten 3,7 millóns de liñas IoT activas en España

Vodafone vén de facer balance da súa actividade recente en materia IoT (siglas de Internet of Things) en España. Segundo informa a operadora no seu reconto, é líder neste segmento con 3,7 millóns de liñas activas no eido estatal.
O meirande fito rexistrouno entre marzo e setembro, cando foi quen de captar 340.000 novas liñas, consolidando o seu papel referencial nun mercado que a compañía considera “clave” para “o desenvolvemento de novos negocios de Industria 4.0, para impulsar a eficiencia enerxética e reducir o impacto ambiental”. De feito, en relación a este últmo punto, no máis recente exercicio fiscal, Vodafone conseguiu evitar a produción de 665.712 Tn de CO2 a través das súas solucións IoT, como resultado da diminución en consumos como a electricidade, o gas e combustibles.
Unha suba do 23%
Estes e outros datos reflicten no número de liñas un incremento do 23% respecto ao mesmo período do ano anterior. Por sectores, o negocios que manteñen unha aposta máis decidida pola tecnoloxía da Internet das Cousas son os da seguridade (a través das alarmas conectadas), a banca (a través dos medios de pago) e os operadores loxísticos. Con todo, comezan a destacar sectores nos que a tendencia é cada vez máis clara na súa aposta por esta tecnoloxía que permite a conexión de obxectos. Así, sinala Vodafone, empezan a acelerarse as solucións IoT no sector das enerxías renovables, a través da sensórica en elementos como paneis solares.
A nivel global, o Grupo Vodafone conta con máis de 123 millóns de conexións IoT en máis de 182 países.