Amigus Labs actualiza e lanza en galego, castelán e inglés o manual de construción con Arduino

Esta recta de final de marzo a comunidade maker mundial está de celebración: desenvólvese a nivel internacional, entre o 21 e o 26 de marzo, a Semana de Arduino. Entre os colectivos e entidades que se suman dende a nosa terra figura a Asociación Amigus, con sede nas Pontes, a través da súa iniciativa de obradoiros argalleiros Amigus Labs.
Con este motivo, veñen de reeditar, actualizar e lanzar en castelán, galego e inglés, en formato PDF, o manual Construción de prototipos con Arduino, que a comunidade de Amigus empregou durante os pasados anos nunha manchea de actividades formativas e divulgativas organizadas polo colectivo arredor da popular placa electrónica aberta.
O obxectivo do manual é aprendernos, “dunha maneira sinxela”, a programar co hardware libre Arduino e “crear pequenos prototipos funcionais, así como exercicios que serven para mergullarnos directamente no apaixonante mundo de Arduino”.
O libro esta enfocado a todo tipo de público desde nenos, familias, profesores… para o seu uso tanto en clase, como na casa ou laboratorios argalleiros.