A CRTVG presentará no Carballo Interplay a plataforma de podcast da Radio Galega

A CRTVG participa esta semana no festival Carballo Interplay, onde a xefa de Programas da Radio Galega, Tania Fernández Lombao, dará a coñecer os detalles da nova plataforma de contidos RadioGalegaPodcast.gal. Ademais, Esther Estévez, presentadora do espazo de fomento da lingua Dígocho Eu, intervirá este xoves 7 de abril na conversa Petiscos no Derby xunto cos artífices do podcast Café Derby 21 e algúns dos creadores e creadoras do momento en novas narrativas dixitais do país.
Contidos especializados en RadioGalegaPodcast.gal
Tania Fernández Lombao presentará este venres 8 de abril, no panel A profesionalización do podcast, o proxecto RadioGalegaPodcast.gal, posto en marcha en outubro de 2021 con contidos especializados en formato sonoro sobre cultura, igualdade, humor, historia, sociedade e ciencia. Deste xeito, a RG adáptase aos novos modelos de consumo da audiencia, permitíndolles aos oíntes gozar de audios específicos a calquera hora e compartilos nas redes dun xeito áxil. No mesmo panel, o venres, intervirán o xefe de Proxectos de Podium Podcast, Jesús Blanquiño, e a directora de Radio Primavera Sound, Marta Salicrú. Os tres falarán do aumento de consumo de arquivos de audio en liña e do seu papel como referencia a nivel mundial na escoita de contidos, ata o punto de que un de cada tres españois é xa oínte habitual de podcast.
A CRTVG explica que desde a posta en marcha de RadioGalegaPodcast.gal, “os seus contidos non deixaron de medrar”, coa progresiva incorporación de novos arquivos nativos dixitais á marxe dos patróns horarios da radio e coa vontade de alcanzar diferentes públicos niño. Así, ao pioneiro Superando a ficción, que esta semana estreou a súa segunda tempada, foron uníndose outros 35 contribucións, coma, entre outros, A fin do mundo, Como que non?, Estudio 3. Desclasificados, Moito ollo e Hey, ho, let’s go!.
Esther Estévez conversa cos creadores do momento
Esther Estévez, de Dígocho Eu, intervirá tamén no certame, este xoves, no marco da conversa Petiscos no Derby. Nela, os artífices de Café Derby 21 veranse as facianas con algúns dos creadores e creadoras do momento en novas narrativas dixitais do país, como a divulgadora científica Tamara Pazos, a youtubeira e tiktokeira Prado Rúa, o creador de contido Olaxonmario, o músico Berto e a propia Estévez.