A pasada fin de semana no pazo de Santo Tomé de Mondoñedo celebrouse a Revolta Rural, certame no que recibiu o segundo premio Skeirrum, un proxecto empresarial de Erea Rodríguez e Cintia Lomba, un par de mozas da Guarda, que xa recibiran o primeiro premio do VIII Encontro Internacional de Mozos Emprendedores 2022, e grazas a estes galardóns poderán rematar de botar a andar o seu proxecto empresarial que combina os xogos da busca do tesouro coas escape rooms.
Skeirrum está deseñado para funcionar a través dunha aplicación web para smartphones que permite adaptar cada partida dun xeito personalizado, convertendo cada xogo nunha nova aventura, podendo desenvolverse en calquera contorno, tanto ao aire libre como en espazos pechados.
Deste xeito, Skeirrum pode crear experiencias adaptadas a vilas, parques naturais, rutas de sendeirismo, cidades, museos… destacando os recursos que ofrece o territorio ou desenvolvendo temáticas determinadas. Conséguese así difundir coñecemento a través da gamificación do patrimonio, a cultura, a natureza ou o ámbito que queiramos.
O proxecto está na súa última fase de desenvolvemento, e nas vindeiras semanas iniciará a súa fase beta.
Vídeo no que se explica a proposta de Skeirrum
