Vodafone desenvolve unha tecnoloxía de localización por satélite cunha precisión de poucos centímetros

Vodafone e Topcon Positioning Group están a desenvolver un novo sistema de posicionamento de precisión para o mercado de consumo que localizará os dispositivos, a maquinaria e os vehículos da Internet das Cousas (IoT) cun maior grao de precisión que se utilizasen unicamente sistemas individuais de satélites de navegación global (GNSS).
Vehículos, scooters ou mesmo cortadoras de céspede robotizadas poderán localizarse de xeito seguro e en tempo real cunha precisión duns poucos centímetros cando se conecten á rede global de IoT de Vodafone e utilicen a tecnoloxía de Topcon, que corrixe as imprecisións dos sinais dos satélites de navegación. A precisión da localización mellórase duns poucos metros a só uns centímetros, grazas á ampla rede europea de Topcon que inclúe miles de estacións de referencia GNSS, especialmente cando os vehículos e dispositivos están equipados con antenas e equipos receptores adecuados.
Vodafone e Topcon iniciarán as primeiras probas, para o que Vodafone está a seleccionar clientes en España, Alemaña e o Reino Unido que queiran unirse a este piloto a partir deste mes. As compañías queren probar o servizo, denominado Vodafone GNSS Corrections, utilizando unha ampla variedade de dispositivos conectados á rede global de IoT de Vodafone (unha das maiores con máis de 150 millóns de conexións) e á súa rede paneuropea, que cobre 12 países.
A precisión milimétrica é fundamental para a adopción masiva da tecnoloxía Vehicle to Anything (V2X) dos vehículos sen condutor, así como para a maquinaria autónoma e robots. Por exemplo, os condutores de bicicletas eléctricas poderían utilizar as correccións GNSS de Vodafone para proporcionar detalles da súa localización exacta e alertar a outros usuarios da estrada da súa presenza.
Vodafone GNSS Corrections complementa a aposta de Vodafone para mellorar a precisión da localización V2X, especialmente cando se comparten datos de confianza para axudar a previr accidentes e mortes innecesarias nas estradas europeas. Así, Vodafone ofrece un posicionamento preciso como complemento á nova Safer Transport for Europe Platform (STEP) da compañía, que permite ás entidades comunicarse entre si cando non existe liña de visión. Presentada en marzo de 2022, STEP foi probada con éxito en Alemaña e o Reino Unido e estará dispoñible a través de Vodafone Automotive e aplicacións de terceiros a finais deste ano.