Uns 200 expertos en patrimonio cultural danse cita este xoves en Santiago convocados por hispanianostra.org

Ao redor de 200 especialistas en diversas disciplinas relacionadas co patrimonio cultural de numerosos países vans dar cita desde este xoves en Santiago de Compostela no Congreso Internacional O patrimonio, unha responsabilidade compartida. O simposio, que dará comezo ese día ás 9 da mañá no Paraninfo da USC da Facultade de Xeografía e Historia, está organizado pola asociación Hispania Nostra, que, dende a súa páxina web, leva anos loitando poñendo o foco na necesidade de coidar os importantes tesouros que herdamos de quen nos precedeu, principalmente a través da sección Lista vermella, dende onde se lanzan periodicamente alarmas sobre os monumentos en perigo.
O obxectivo do congreso é “promover a necesidade da participación social na conservación do patrimonio cultural ao entender que este constitúe unha inmensa riqueza que pertence ao conxunto da sociedade”.
O presidente da Xunta de Galicia, Alfonso Rueda, xunto á presidenta de Hispania Nostra, Araceli Pereda, inaugurarán o congreso internacional ás 9.30 horas do xoves.
No simposio participarán especialistas europeos e americanos “que analizarán, desde diversas experiencias, a importancia da toma de conciencia da cidadanía, por ser a creadora e usuaria de todo o patrimonio cultural e, ademais, porque dela emanan tanto as normas protectoras como as institucións encargadas da súa aplicación e, por conseguinte, é a principal e última responsable da súa conservación”.
Europa Nostra, a quen Hispania Nostra representa en España, conmemora este ano 60 aniversario da súa constitución e, segundo avanza a organización do evento, “queremos que o congreso contribúa á celebración dun dos exemplos de supervivencia e boas prácticas na cooperación público-privada en Europa”.
Entre os relatores do congreso destacan Hermann Parzinger, presidente executivo de Europa Nostra e gañador da Gran Cruz de Alfonso X O Sabio; Araceli Pereda, presidenta de Hispania Nostra e Premio Nacional de Restauración e Conservación de Bens Culturais (2020); María Teresa Carballeira Rivera, catedrática de Dereito Administrativo da Universidade de Santiago de Compostela; Mechthild Rössler, ex-directora do Centro Patrimonio Mundial da UNESCO (Alemaña); Miguel Ángel Cortés Martín, ex-secretario de Estado de Cultura, ou Darlene McCloud, vicepresidenta de WMF-World Monuments Fund (EEUU).
Dentro do programa do Congreso Internacional incluíronse visitas ao propio Santiago de Compostela e a Touro.