InprOTech desprega o novo Laboratorio e Centro Demostrador de Ciberseguridade Industrial da Xunta

A pontevedresa InprOTech foi a empresa adxudicataria pola Xunta de Galicia, a través da axencia AMTEGA, do contrato para a subministro, despregadura e prestación de servizos do Laboratorio e Centro Demostrador de Ciberseguridade Industrial de Galicia, unha infraestrutura estratéxica que forma parte dunha iniciativa conxunta do Goberno autonómico composta por dous laboratorios e centros demostradores complementarios no ámbito da protección tecnolóxica.
Esta iniciativa enmárcase no proxecto RETECH – Redes Territoriais de Especialización Tecnolóxica, e desenvólvese en colaboración co Instituto Nacional de Ciberseguridad (INCIBE).
Segundo informou a empresa, este novo laboratorio suporá un salto cualitativo en protección tecnolóxica industrial coa “creación dunha das infraestruturas máis avanzadas do sur de Europa, reforzando as capacidades de Galicia neste ámbito e actuando de maneira complementaria ao segundo laboratorio impulsado pola Xunta dentro do mesmo programa RETECH”.
En conxunto, ambos os laboratorios conforman un ecosistema integrado que proporcionará a empresas, administracións e axentes tecnolóxicos unha contorna avanzada para a experimentación, formación, validación e demostración de solucións destinadas a salvagardar contornas produtivas e sistemas de control industrial (OT/ICS).
Ademais, o centro contribuirá ao aumento da competitividade internacional da industria galega, ofrecendo un espazo onde validar solucións antes da súa saída ao mercado, favorecendo a atracción de talento especializado e reforzando o posicionamento de Galicia como referente en ciberseguridade industrial dentro do marco dos laboratorios complementarios da Xunta de Galicia.
A proposta de InprOTech destacou polo seu alto nivel de especialización técnica e pola creación dunha contorna de probas real con laboratorios de ciberseguridade orientados á Industria 4.0 en coordinación co resto das infraestruturas complementarias impulsadas pola Xunta de Galicia no marco do programa RETECH.
O novo centro é unha infraestrutura crítica real, deseñada para reproducir con fidelidade escenarios industriais de alto valor estratéxico para a Comunidade Autónoma.
Despregaranse escenarios físicos que replicarán diferentes sectores industriais estratéxicos da economía galega, integrando maquetas do ciclo da auga, xeración e distribución de enerxía, alimentación, manufactura para automoción ou sector naval. “Estas maquetas”, informou a empresa, “permitirán simular procesos reais e analizar o impacto de ciberincidentes en contornas controladas”, e entre os exercicios que poderán realizarse destacan os seguintes: simulación de ataques que poderían paralizar liñas produtivas; avaliación do impacto de incidentes en sistemas de control; e formación práctica ante fallos operativos ou interrupcións de procesos.
O laboratorio combinará contornas físicas con plataformas de simulación multiusuario e capacidades remotas para equipos externos, permitindo “unha flexibilidade única”, en palabras da firma, que engade que “isto facilitará avaliar riscos, adestrar a profesionais e executar probas avanzadas sen afectar a contornas produtivas reais, reforzando a complementariedade co resto dos centros demostradores da Xunta de Galicia integrados en RETECH”.
O centro integrará solucións referentes do mercado para monitoraxe de tráfico OT, detección de activos e anomalías, habilitar devasas industriais, desenvolver auditorías e análises de vulnerabilidades, establecer correlación de eventos, e activar ferramentas avanzadas de resposta ante incidentes.
Máis aló do deseño e despregadura do laboratorio, InprOTech asumirá tamén a súa explotación, ofrecendo servizos orientados a fomentar a resiliencia, madurez e capacitación da industria galega. “A operación do laboratorio permitirá xerar un fluxo continuo de coñecemento, formar a novos especialistas OT e acompañar a empresas na súa evolución en ciberseguridade, contribuíndo de forma coordinada aos obxectivos globais da rede de laboratorios complementarios da Xunta de Galicia, desenvolvidos en colaboración con INCIBE”, sinalou InprOTech.