Altia centraliza a xestión da loxística de Incarlopsa nunha única plataforma dixital

Incarlopsa, compañía española especializada en produtos cárnicos porcinos, implantou unha solución tecnolóxica avanzada que permite centralizar toda a xestión do seu transporte nunha única plataforma dixital. Grazas a esta integración, realizada pola firma Altia, con sede en Oleiros, Incarlopsa pode visualizar en tempo real o estado da súa frota propia e de terceiros, optimizando así os procesos loxísticos, reducindo a carga administrativa e mellorando a capacidade de reacción ante incidencias.
O proxecto púxose en marcha en outubro de 2024 e logrou xa unha cobertura completa.
Incarlopsa é unha empresa cunha estrutura que integra toda a cadea de valor, desde a produción gandeira ata a distribución final, conta con 12 plantas industriais repartidas en Castela-A Mancha, Castela León e Andalucía e unha forte aposta pola innovación, a calidade e a sustentabilidade. O seu crecemento e diversificación incrementaron a complexidade das operacións loxísticas que desenvolve, que implican tanto á súa propia frota como a operadores externos. Segundo explican dende Altia, “esta dispersión xeraba dificultades para o control en tempo real do transporte, a coordinación de cargas e descargas e a prevención de incidencias, o que motivou a procura dunha solución tecnolóxica integral que garantise visibilidade, rastrexabilidade e eficiencia en todo o proceso”.
O sistema implantado baséase na nosa solución Control Tower, ferramenta que centraliza baixo unha única contorna dixital a visibilidade de todos os procesos loxísticos asociados á actividade de Incarlopsa. A compañía, que opera tanto con transporte propio como con ao redor de 15 operadores loxísticos externos, requiría unha solución capaz de consolidar toda esa información dispersa nunha soa fonte de confianza e accesible.
Esta complexidade abordouse mediante unha integración técnica cos sistemas TMS (Transportation Management System) e os dispositivos GPS embarcados nos camións dos distintos operadores. Ademais, Altia despregou unha aplicación móbil que permite aos condutores introducir información crave sobre as operacións: hora de carga, descarga, incidencias ou paradas imprevistas.
Toda esta información sincronízase cos sistemas ERP de Incarlopsa, proporcionando aos seus coordinadores loxísticos “unha visión completa e en tempo real de cada roteiro”, salientou Altia, destacando tamén que “a ferramenta tamén permite medir variables críticas como a temperatura nos camións refrixerados, grazas á integración cos sensores de frío, e emitir alertas automáticas ante calquera desviación”.
Altia engade que o resultado é “unha operativa máis áxil, con redución de chamadas, eliminación de correos redundantes, maior rastrexabilidade e capacidade para detectar colos de botella e avaliar o desempeño de cada provedor mediante indicadores (KPIs) precisos”. Ademais, a integración facilita o traballo nos almacéns de destino, xa que os operarios coñecen con antelación a hora estimada de chegada dos camións, mellorando a asignación de recursos e reducindo tempos de espera.
A posta en marcha do sistema implicou, ademais do desenvolvemento técnico, un traballo continuado de acompañamento e formación cos equipos e operadores loxísticos.