Google anunciou novas funcións educativas para o seu buscador e Gemini co obxectivo de facilitar a aprendizaxe e a preparación de exames mediante ferramentas interactivas, cuestionarios personalizados, simulacións en 3D e sistemas para organizar materiais de estudo.
O buscador incorpora a posibilidade de xerar ferramentas e simulacións adaptadas ás consultas dos usuarios. Unha procura sobre a escala de pH, por exemplo, pode mostrar un recurso interactivo dentro das Escolmas xeradas por IA para facilitar a comprensión do concepto. As consultas posteriores poden facer que o Modo IA cree experiencias máis específicas, como situar diferentes cítricos na escala de pH. As capacidades de interface xerativa están dispoñibles globalmente en inglés no Modo IA e comezaron tamén a chegar ás Escolmas xeradas por IA.
Os estudantes tamén poden solicitar cuestionarios personalizados directamente desde o buscador sobre materias como ciencias, matemáticas, humanidades ou linguas estranxeiras. As probas poden incluír explicacións para cada resposta e ligazóns para ampliar a información. A función está dispoñible globalmente en inglés e permite preparar exames estandarizados como o SAT, ACT, GRE, LSAT ou MCAT, entre outros.
Google Lens recibirá nas próximas semanas unha nova experiencia interactiva para axudar a resolver problemas paso a paso. O usuario poderá fotografar os exercicios desde a aplicación de Google e obter explicacións mediante IA, indicacións sobre posibles erros e orientación cando quede atascado. A función chegará globalmente en inglés.
O buscador de Google tamén permitirá crear documentos de estudo a partir de materiais achegados polo usuario, como fotografías de apuntamentos manuscritos, documentos, presentacións ou follas de cálculo. Entre as posibilidades está a creación dun resumo dunha páxina cos conceptos fundamentais a partir de diferentes materiais.
Outra das novidades é a chegada dos cadernos de Gemini ao Modo IA, que permiten organizar fontes como apuntamentos, presentacións, programas de materias ou artigos web nun mesmo espazo. Os cadernos xa existentes en Gemini Notebook (anteriormente NotebookLM) ou na aplicación Gemini aparecerán automaticamente no buscador, mantendo sincronizadas as fontes e instrucións. A función está a despregarse en máis de 180 países en inglés.
Gemini incorpora ademais un novo espazo específico para estudantes que reúne as ferramentas educativas nun único lugar. Desde este centro será posible crear cadernos de estudo, fichas de memoria e cuestionarios, entre outras funcións.
Os cadernos de estudo de Gemini, introducidos en xuño, permiten cargar materiais académicos para que a IA prepare un plan de aprendizaxe. O sistema pode realizar un cuestionario inicial para detectar lagoas de coñecemento e, a partir dos resultados, xerar leccións e cuestionarios adaptados, acompañados dun panel para seguir o progreso. Nas próximas semanas tamén incorporará gráficos e imaxes ás leccións e poderá trasladar a Google Calendar datas relevantes, como exames ou entregas, a partir dos programas das materias, sempre co permiso do usuario.
As respostas de Gemini tamén poden incluír agora visualizacións interactivas, táboas, grellas e simulacións funcionais en 3D creadas especificamente para cada consulta. Unha pregunta sobre o funcionamento do ADN, por exemplo, pode xerar un modelo tridimensional que o usuario pode rotar e ampliar para examinalo desde diferentes ángulos.
Gemini Live, pola súa parte, incorpora a capacidade de executar investigacións profundas de varios pasos en segundo plano. O usuario pode pedir unha investigación sobre un tema, pechar a conversa ou bloquear a pantalla e recibir unha notificación cando o informe estea preparado. A partir dese momento pode conversar sobre os resultados mediante a voz, formular preguntas adicionais ou pedir modificacións.
Estas funcións forman parte da estratexia de Google para converter Gemini nunha ferramenta máis completa para o estudo, combinando investigación, materiais propios, práctica, visualizacións e interacción por voz. As novas funcións de Gemini están a chegar aos usuarios da aplicación, mentres que varias das novidades do buscador se están despregando inicialmente en inglés.
Google tamén anunciou novas ferramentas para docentes en Classroom, destinadas a permitir que os profesores adapten o uso da IA ao seu currículo e sigan o progreso dos estudantes. A integración de Classroom con Gemini permite ademais preparar borradores de programacións didácticas a partir dos materiais educativos.
