O programa Entrena Emprego Rural, impulsado pola Fundación Santa María La Real, ofrece acompañamento e formación gratuíta a mulleres desempregadas de concellos rurais galegos para mellorar as súas oportunidades de acceso ao mercado laboral. Participan na edición 2026 do programa municipios como o de Boqueixón, o da Baña, o de Curtis ou o da Caniza, entre outros.
En boa parte dos casos a posta en marcha da segunda edición do programa celebrarase durante este outono e parte do inverno, do 14 de setembro ao 15 de decembro de 2026.
O proxecto, que conta con financiamento de fondos europeos, está dirixido de xeito xeral a mellorar a empregabilidade e o acceso ao mercado laboral de mulleres desempregadas residentes en contornas rurais destas provincias.
Consta de dúas sesións grupais online á semana, de 09:30 a 12:30 horas, complementadas con sesións individuais adaptadas ás necesidades de cada participante.
Durante o programa traballaranse, entre outros aspectos, o desenvolvemento de competencias e habilidades para o emprego; a posta en valor das capacidades adquiridas durante as etapas de coidados; a mellora das competencias dixitais e relacionadas coa transición ecolóxica; o emprendemento no ámbito rural; o reforzo da autoestima e da xestión emocional; e a creación de redes sociais e laborais para facilitar a busca de emprego.
As participantes contarán co apoio dun equipo especializado formado por técnicas de emprego, acompañamento dixital e intermediación laboral.
Para as mulleres que non poidan participar no horario das sesións grupais ou teñan dificultades relacionadas coas responsabilidades de coidados, existe a posibilidade de establecer itinerarios personalizados e flexibles.
