Javier Romero e Nuria Rodríguez, director xeral e presidenta da Fundación TokApp Impulsa, e Juan Carlos Rodríguez, presidente de AFAGA
Os presidentes da Asociación de Familiares de Enfermos de Alzhéimer e outras demencias de Galicia (AFAGA), Juan Carlos Rodríguez, e da Fundación TokApp Impulsa, Nuria Rodríguez, asinaron hoxe no Centro de Innovación de Alzhéimer de Galicia (CIAG), de Vigo, un acordo marco de colaboración para o desenvolvemento e financiamento solidaria de actividades e proxectos tecnolóxicos orientados a satisfacer e mellorar as necesidades socioeducativas das persoas.
No ámbito formativo e divulgativo, ambas as entidades colaborarán en actividades de sensibilización, concienciación social e capacitación comunitaria, así como na prevención e detección precoz da deterioración cognitiva, mediante a promoción do deporte e do envellecemento activo e saudable (smart-ageing).
AFAGA e a Fundación TokApp Impulsa traballarán tamén, de forma coordinada, en actividades interxeracionais e de lecer terapéutico, en accións contra o idadismo, na desestigmatización das demencias e da discapacidade e en calquera outra iniciativa que mellore a calidade de vida, a inclusión social e participación activa das persoas atendidas por ambas as entidades.
“Esta alianza con AFAGA permítenos achegar a nenos e mozos unha realidade que moitas veces xa está presente nas súas propias familias, axudándolles a comprender o que sucede cando un avó ou un ser querido comeza a convivir co alzhéimer”, sinalou Nuria Rodríguez, presidenta da fundación, engadindo que dende “TokApp poñemos ao dispor de AFAGA todo o noso ecosistema educativo, tecnolóxico e social para ampliar o seu labor de sensibilización e chegar a máis familias”
Para Juan Carlos Rodríguez, presidente de AFAGA, “este acordo coa Fundación TokApp Impulsa non só abre unha vía de comunicación directa coa contorna educativa e as familias para difundir todas as nosas accións e proxectos, senón tamén a oportunidade de canalizar proxectos e microproxectos, que aborden a interxeracionalidade e as necesidades das persoas con demencia, a través da plataforma solidaria da Fundación, para a procura conxunta de financiamento”.
A Fundación TokApp Impulsa é a nova denominación de Fundación Lingoreta, tras incorporar no seu padroado á plataforma tecnolóxica de comunicación entre centros educativos e familias, a ferramenta TokApp, con presenza en máis de 12 países e conectada con miles de colexios, asociacións e institucións.
Mantendo o seu propósito inicial de facilitar apoio profesional a persoas en situación de vulnerabilidade, a fundación céntrase en xerar oportunidades para nenos, nenas, mozas e familias, mediante proxectos relacionados coa educación, a tecnoloxía, o benestar e o desenvolvemento do talento.
O seu modelo combina acción social, participación comunitaria e tecnoloxía destinadas a impulsar iniciativas de apoio psicolóxico e terapéutico, programas de dixitalización educativa, bolsas tecnolóxicas, intelixencia artificial aplicada á educación, formación para docentes, axudas a colexios e proxectos sociais destinados a reducir a brecha educativa e dixital.
