A Comisión Europea propuxo un sistema común de clasificación para os centros de datos da Unión Europea co obxectivo de aumentar a transparencia sobre o seu consumo enerxético e favorecer a súa integración sostible no sistema eléctrico europeo.
A medida afecta aos centros de datos individuais cunha capacidade superior aos 500 kW e permitirá ofrecer información sobre o uso real de recursos como a electricidade e a auga. A clasificación tamén terá en conta a contribución destas instalacións ao sistema enerxético, incluíndo a reutilización da calor residual, a incorporación de capacidade de xeración de enerxía limpa e a flexibilidade no consumo eléctrico.
A reutilización de aproximadamente a metade da calor residual xerada polos centros de datos europeos equivalería, segundo a Comisión, á demanda total de calefacción de 4 millóns de fogares da UE. A capacidade para adaptar o consumo eléctrico ás condicións da rede pode contribuír tamén a reducir os custos do sistema, mellorar a estabilidade da rede e facilitar a integración de fontes renovables.
A iniciativa chega nun momento de forte expansión da capacidade de computación europea. A UE pretende triplicar a súa capacidade de centros de datos nos próximos cinco ou sete anos para reforzar a súa autonomía tecnolóxica e soberanía dixital. O crecemento previsto implica, á súa vez, un maior consumo de electricidade, presión sobre as redes e sobre recursos como a auga e un posible incremento das emisións de carbono.
A Comisión abriu tamén unha consulta pública sobre a introdución de estándares mínimos de eficiencia para os centros de datos que operan en Europa. A consulta permanecerá aberta ata o 14 de decembro de 2026 e pretende contribuír á creación dun marco que favoreza instalacións máis eficientes e a aparición de mercados europeos de produtos e servizos dixitais sustentables.
O regulamento delegado que establece o novo sistema de clasificación queda agora sometido a un período de escrutinio de dous meses por parte do Parlamento Europeo e do Consello. Os primeiros distintivos de sustentabilidade para centros de datos individuais están previstos para 2027, mentres que a primeira revisión do sistema terá lugar antes de que remate 2028.
O consumo eléctrico asociado aos centros de datos da UE situouse en torno aos 68 TWh en 2024. A Axencia Internacional da Enerxía (AIE) prevé que esta cifra practicamente se duplique ata os 114 TWh en 2030, impulsada principalmente polo crecemento da intelixencia artificial, o que suporía máis do 3 % da demanda eléctrica total da Unión.
