As lentes Meta Ray-Ban Display amplían as súas posibilidades con novas funcións de navegación, chamadas mediante hologramas, aplicacións específicas e integracións adicionais, ao tempo que chegan a novos mercados europeos.
A navegación mans libres incorpora indicacións para desprazamentos en bicicleta e transporte público. O usuario poderá solicitar por voz unha ruta e consultar na pantalla das lentes as indicacións paso a paso ou as próximas saídas do transporte público, sen sacar o teléfono. Esta función estará dispoñible a finais de setembro nos EE.UU. e Canadá.
As indicacións para os desprazamentos a pé tamén buscan aproveitar o que capta a cámara das lentes. En lugar de basearse exclusivamente nos nomes das rúas, o sistema poderá utilizar elementos visibles da contorna para orientar o usuario, por exemplo indicándolle que xire á esquerda ao chegar a unha casa amarela.
As chamadas de vídeo incorporarán ademais unha función de holograma. Tras realizar unha breve captura coa aplicación Meta AI, o usuario poderá crear unha representación dixital fotorrealista do seu rostro para empregala durante as chamadas realizadas desde as lentes. O holograma xerará as expresións a partir da voz e da maneira de falar do usuario. A función comezará a probarse en acceso anticipado en WhatsApp para usuarios das Meta Ray-Ban Display nos EE.UU. durante o outono.
A nova aplicación Explore permitirá descubrir e utilizar desde as propias lentes unha selección crecente de experiencias deseñadas especificamente para este dispositivo, con propostas orientadas á aprendizaxe, á exploración e ao entretemento.
A captura de vídeo tamén recibe unha mellora coa incorporación de Dolby Atmos. Meta destaca que as súas lentes con IA son o primeiro dispositivo de consumo capaz de gravar vídeo con este formato de son espacial, permitindo conservar un campo sonoro envolvente para a súa posterior reprodución.
O calendario tamén gaña funcións adicionais: será posible consultar quen participa nunha reunión, aceptar ou rexeitar invitacións e incorporarse ás reunións directamente desde as lentes. Esta opción estará dispoñible en inglés nos EE.UU. Proximamente tamén se poderán visualizar na pantalla das lentes as notificacións seleccionadas do teléfono, mentres que Threads permitirá consultar fontes de comunidades e republicar publicacións.
A expansión comercial levará as Meta Ray-Ban Display ao Reino Unido, Canadá, Francia, Italia e Alemaña. A venda en liña e nos establecementos comeza hoxe no Canadá e no Reino Unido, mentres que en Francia, Italia e Alemaña os pedidos anticipados comezarán progresivamente hoxe e a venda en liña e en tendas está prevista para o 13 de outubro. En Francia e Italia tamén estará dispoñible a adaptación a lentes graduadas desde esa data, mentres que en Alemaña chegará posteriormente. Polo momento non hai previsión da chegada do produto a España, pois as dificultades para a súa produción en masa está a provocar que o seu espallamento internacional teña que ser bastante lento.
