Apple publicou unha nova guía elaborada en colaboración coa American Academy of Pediatrics (AAP) para axudar ás familias a establecer hábitos dixitais que permitan compatibilizar o uso das pantallas co descanso, o exercicio, os deberes e o tempo dedicado ás amizades e á familia.
O documento, titulado Crear hábitos dixitais saudables: unha guía para as familias, adapta as recomendacións da AAP aos controis parentais integrados nos dispositivos de Apple e propón un proceso en seis pasos que as familias poden adaptar ás diferentes idades e necesidades dos menores.
O primeiro consiste en iniciar unha conversa sobre o tempo de uso dos dispositivos e establecer expectativas compartidas. A guía propón despois crear unha Conta Infantil con restricións axeitadas para cada idade e configurar os axustes de seguridade das aplicacións e dos sitios web, incluídas funcións como Solicitar a Compra e Pedir Permiso para Navegar.
A planificación do tempo de uso permite establecer Límites de Tempo e Horarios para combinar a actividade dixital con outras rutinas, mentres que a xestión das comunicacións permite decidir con quen poden falar os menores. Neste último caso, Seguridade nas Comunicacións está activada por defecto para menores de 18 anos e está deseñada para axudar a evitar a visualización ou o envío de contido delicado.
O sexto paso consiste en revisar periodicamente as normas establecidas e adaptalas a medida que cambian as necesidades dos menores. A guía incorpora tamén recomendacións da AAP sobre o tempo de pantalla para diferentes grupos de idade, desde os primeiros anos ata a adolescencia.
«Cada familia aborda a tecnoloxía á súa maneira», sinala Sumbul Desai, vicepresidenta de Saúde e Fitness de Apple. A responsable explica que a colaboración pretende combinar as recomendacións da AAP coas ferramentas integradas nos produtos de Apple para ofrecer ás familias un punto de partida á hora de establecer as súas propias rutinas dixitais.
Mark Del Monte, director executivo da AAP, destaca que a colaboración busca ampliar o acceso ao Plan de Contido Multimedia Familiar da organización e ofrecer ás familias orientación para xestionar o uso das pantallas e das redes sociais.
