A vicepresidenta da Deputación de Pontevedra, Luisa Sánchez, visitou hoxe a sede da Administración provincial en Vigo para comprobar o desenvolvemento do obradoiro +Tecnoloxía do que se beneficia a Asociación Empresarias Galicia, como parte do programa provincial +Xuntas.
O curso, no que participan 14 socias da entidade entre o 6 de outubro e o 29 de decembro, está pensado para aprender o necesario sobre a xestión e administración das redes sociais.
Entre os obxectivos principais atópanse o deseño de estratexias para promover un servizo ou produto mediante as redes sociais e a xestión dunha páxina de empresa en Facebook, ademais de perfís profesionais en Instagram e YouTube.
O programa +Xuntas ofrece obradoiros orientados a mellorar a formación, a autonomía e a participación social das mulleres, fomentar as redes de apoio e promover a igualdade de oportunidades.
O bloque formativo +Tecnoloxía dentro do programa +Xuntas de Igualdade da Deputación de Pontevedra está especificamente deseñado para reducir a fenda dixital de xénero. O obxectivo é dotar ás mulleres de ferramentas dixitais clave para mellorar a súa autonomía e empregabilidade. Ponse o foco no práctico e seguro de plataformas dixitais e redes sociais tanto para o ámbito persoal como para a visibilidade de proxectos.
