Sony anunciou os tres xogos mensuais que poderán conseguir os subscritores de PlayStation Plus en novembro. Dead Island 2, Tomb Raider IV-VI Remastered e Monster Train 2 estarán dispoñibles desde o martes 3 ata o luns 30 de novembro.
Dead Island 2 poderá xogarse en PlayStation 5 e PlayStation 4. Este xogo de rol e acción con zombis traslada a acción a Los Ángeles, convertida nunha cidade infestada de mortos viventes. A aventura combina misións, personaxes superviventes e combates corpo a corpo nos que se pode recorrer a un amplo arsenal de armas para acabar coas hordas de inimigos. Permite xogar en solitario ou formar equipos de ata tres participantes no modo cooperativo en liña.
Tomb Raider IV-VI Remastered tamén estará dispoñible en PS5 e PS4. Esta colección reúne tres entregas da etapa máis escura da saga protagonizada por Lara Croft: Tomb Raider: The Last Revelation, Tomb Raider: Chronicles e Tomb Raider: The Angel of Darkness. A edición remasterizada permite alternar en calquera momento entre os gráficos actualizados e os modelos poligonais orixinais.
Pola súa banda, Monster Train 2 chegará a PlayStation 5 cunha aventura para un único xogador que combina construción de mazos e mecánicas roguelite. A partida sitúa o usuario ao mando dunha alianza de anxos e demos que debe derrotar os titáns que tomaron o control do Ceo. A viaxe atravesa o Inferno, o Ceo e o Abismo a bordo de trens nos que cómpre defender tres niveis verticais, recrutar unidades, mellorar cartas e elaborar estratexias para superar os inimigos. O xogo incorpora cinco clans novos, cada un con habilidades propias que permiten desenvolver diferentes estilos de combate.
