O xogo Phantom Blade Zero, ao que a propia PlayStation dedicou un State of Play afondando nas súas mecánicas de combate, apunta a converterse nun dos grandes éxitos comerciais de 2026. As estimacións de Alinea Analytics sitúan as vendas anticipadas do xogo de acción por riba do millón de copias, sumando as reservas e compras nas plataformas occidentais e na tenda chinesa WeGame.
Rhys Elliott, responsable de análise de mercado de Alinea Analytics, calcula que o título acumulou unhas 850.000 copias vendidas nas plataformas Steam e PlayStation 5 nos mercados occidentais. Aproximadamente tres cuartas partes desa cifra corresponderían á tenda de Valve. Ao engadir as vendas de WeGame, o total superaría o millón de unidades.
China, Taiwán e Hong Kong concentran case dous terzos das vendas anticipadas. A distribución xeográfica encaixa coa orixe do xogo, desenvolvido polo estudio chinés S-Game e ambientado no universo das artes marciais chinesas. A produción conta coa participación do actor e especialista en artes marciais Donnie Yen.
As vendas previas ao lanzamento xerarían uns ingresos de 43 millóns de dólares (39 millóns de euros) e situarían Phantom Blade Zero entre os 40 videoxogos con maior facturación de 2026, mesmo antes de chegar ao mercado.
Elliott considera pouco probable que alcance as cifras de Black Myth: Wukong, o outro gran éxito recente da industria chinesa. Desenvolvido por Game Science, este xogo vendeu 10 millóns de copias nos seus tres primeiros días e superou os 20 millóns de unidades acumuladas, mentres continúa o desenvolvemento dunha secuela.
As primeiras valoracións tamén apuntan a unha boa recepción por parte da crítica (actualmente ten unha puntuación de 88 sobre 100 en Metacritic). Phantom Blade Zero destaca polo seu sistema de combate, os enfrontamentos contra xefes e a fluidez das animacións, elementos que contribúen a situalo entre os lanzamentos máis destacados de outubro.
