A Policía de Ourense localiza no eMule 4.000 historias clínicas de abortos

Se cadra unha boa parte dos internautas que andaron algunha vez polo eMule tiveron dúbidas sobre as súas vantaxes. Certo: permite compartir cancións e películas ás que doutro xeito non se podería chegar. Pero tamén é verdade que moito do que circula por esta rede vale moitísimo menos có lixo (este, polo menos, recíclase). Filmes porno ás acochadas, xente que devece por dar a coñecer a súa música e faise chamar polo nome de artistas coñecidos, virus, infeccións, programas espía, cancións incompletas… a listaxe eternízase. Porén, poucas veces se ten rexistrado algo tan fóra de lugar como o rexistrado pola Policía Local de Ourense na dita rede p2p: un fluxo de 11.300 historias clínicas, 4.000 das cales se corresponden a casos de aborto.
A pregunta que nos podemos facer é a seguinte: a quen lle pode interesar compartir esa información? Segundo El País, o problema é doutra índole, e se eses historiais estiveron durante certo ó alcance de calquera non foi por un interese premeditado senón por algo tan sinxelo como non poñerlle un valado á información que non interesaba compartir.
Ou sexa: que se deixou a porta aberta do disco duro a disposición de calquera (porque niso se basea unha rede p2p, nunha chea de portas abertas en ordenadores con acceso a Internet e nas que todos os que integran a rede poden petar). Así, a orixe estivo case con toda probabilidade nun desleixo ou ben nunha falta de coñecemento tecnolóxico, ou ben en ámbalas dúas circunstancias. Isto fixo que a información dun centro médico de Bilbao quedase ó descuberto e sen valar.
Consecuencia: a Axencia Española de Protección de Datos (AEPD) vén de sancionar á clínica cunha suma de 150.000 euros. Segundo o devandito xornal, o centro non quixo achegar declaracións, pero os seus responsables xa aseguraron previamente perante a AEPD que non tiñan coñecemento de como o ficheiro fora dar á Rede á vista de todos os internautas. Entre os ficheiros atópase información tan delicada como a que se refire á interrupción voluntaria do embarazo de centos de mulleres.
Como dixemos, os datos foron localizados no eMule pola Policía Local de Ourense. Segundo informa El País, o devandito corpo está a velar especialmente pola privacidade e pola seguridade dos datos na Internet. De feito, foron os policías da cidade galega os que advertiron de posibles infraccións en todos os expedientes abertos en Protección de Datos ó longo de 2007.