GalizaSport.com ofrece hosting de balde para os organizadores de eventos deportivos

A web de novas GalizaSport.com, creada en novembro do pasado ano para darlle unha oportunidade a aqueles deportes que, como o tenis de mesa, a natación o ciclismo ou o squash só gozan en Galicia dun par de columnas nas páxinas dos xornais locais, vén de dar un paso máis na promoción dos deportes minoritarios ofrecendo deseño e aloxamento de balde a todas aquelas persoas ou entidades que queiran organizar un torneo ou calquera outro evento deportivo na nosa terra. E isto con independencia de cal sexa disciplina.
Coa finalidade de que GalizaSport se poida involucrar un pouco máis no deporte galego e vaia superando día a día o número de usuarios diarios da web, os responsables da mesma ofrecen (totalmente de balde) un servizo de hosting e deseño dunha web a medida para calquera agrupación deportiva ou equipo que leve a cabo un torneo ou evento deportivo en Galicia.
O acceso á web do torneo en cuestión realizarase por unha web do tipo “nomedotorneo.galizasport.com” e incluirá (de xeito obrigatorio) o logo de GalizaSport para beneficiar a ámbolos dous organismos e darlles a máxima repercusión posible.
Os interesados nesta oferta poden atopar máis información na web disposta para o mesmo, mitorneo.galizasport.com ou contactar cos responsables da web a través do enderezo electrónico.