Elogia afonda en Mondariz nas novas tendencias do marketing interactivo

O Grupo Elogia especializado en “marketing 360º” vén de anunciar que o vindeiro 16 de maio terá lugar en Mondariz un seminario de novas tendencias do marketing interactivo, orientado a dar a coñecer as novidades que nos últimos anos se están a producir no mundo da comunicación, sobre todo en Internet.
O evento, que fusionando as sonoridades xaponesa e norteamericana como referentes da innovación no sector se fai chamar TEKU´08: The Exclusive Knowledge Update 2008 (A exclusiva Actualización de Coñecementos 2008), ten como público obxectivo aos responsables de promoción e publicidade das grandes empresas do noroeste peninsular e centrarase sobre todo en dar a coñecer o modo no que Internet está revolucionando a comunicación das empresas cos seus clientes.
Segundo os responsables da devandita compañía, “prevese que este ano en España, Internet se sitúe como o terceiro medio en importancia, só por detrás da televisión e dos xornais” polo que este seminario centrará os seus relatorios en explicar ao tecido empresarial as tendencias máis acusadas e imprescindibles deste tipo de marketing en todas as súas vertentes, en especial o fenómeno da Web 2.0.
Asemade, neste mesmo evento, daranse a coñecer os resultados do estudo anual Elogiómetro, efectuado cun panel de 1.000 empresas de tódolos sectores e perfís do país, e que achega unha visión “precisa e detallada” abonda do nivel de uso concreto e tendencias de adopción das diversas ferramentas de promoción en liña actuais.
O ano pasado, Elogia xa celebrou encontros semellantes de formación e networking en Barcelona e Madrid, aos cales asistiron preto de 500 representantes da clase directiva empresarial.
Este exercicio, o seminario terá lugar primeiro en Galicia e logo en Barcelona e Madrid.
O encontro desenvolverase pola mañá e incluirá unha comida para favorecer as relacións sociais entre os profesionais (networking) e, posteriormente, aproveitando as instalacións do prestixioso Balneario de Mondariz, un circuíto termal.