O casco vello de Pontevedra ofrecerá acceso libre á Internet sen fíos

O casco vello de Pontevedra terá conexión á Rede sen fíos antes de que remate o ano, segundo se informa en La Voz e no caderno Beber para olvidar. O proxecto, que forma parte doutros programas máis amplos para poñer en valor a cidade histórica, inclúe o despregue dunha rede Wi-Fi a libre disposición dos veciños e tamén dos visitantes. O único requisito que se lles pide neste senso é que se atopen nunha zona de cobertura, ou sexa, dentro do casco vello.
A medida vai encamiñada a darlle azos á vida comercial da zona, amais de animar á xente a procurar residencia nela (é polo tanto un paso máis na revitalización da cidade vella, logo da conexión a servizos como o cable ou o gas).
O orzamento da iniciativa vai ser de 50.000 euros. O proxecto, polo visto, non é novo: xa foi tratado en decembro do ano pasado, pero non chegou a concretarse ata esta semana.