Os investidores de Yahoo! desconfían de Jerry Yang e piden «supervisión adulta» nas negociacións con Microsoft

Jerry Yang e David Filo rexeitaron a primeiros de mes a oferta de 33 dólares por acción que lles fixo Steve Ballmer pola súa compañía, Yahoo!, pois non querían aceptar menos de 37 dólares por cada participación (pese a que en bolsa chegaron a cotizar a menos de 25 dólares). Esta decisión non foi moi ben recibida polo resto de accionistas da compañía, e agora que se retoman as negociacións con Microsoft, Roy Bostock e outros altos directivos de Yahoo! deberán exercer unha «supervisión adulta», pois todo indica a que Yang estaba a actuar máis co corazón (teme perder o control dunha compañía que fundou) que co cerebro.
Nesta situación, Yahoo! vén de anunciar un retraso na celebración da xunta anual de accionistas, que debería celebrarse o 3 de xullo e finalmente será a finais do mesmo mes. Esta demora podería responder ás actuais negociacións de Microsoft, que poderían supor un cambio radical na estratexia a longo prazo da empresa, e evitaría que os investidores tomasen represalias contra a xunta directiva actual (da que xa dimitiu un membro, Edward Kozel, alegando razóns persoais).