CNET publica unha listaxe de emisións de terminais de telefonía móbil

Os usuarios preocupados polas emisións electromagnéticas dos seus móbiles poden consultar unha relación de medicións de radiación feitas na meirande parte dos móbiles comercializados nos EE.UU., demostrando que ningún dos terminais supera a taxa específica de absorción (SAR) máxima imposta polas autoridades europeas e americanas (en EE.UU. o máximo é de 1,6 w/Kg. mentres que en Europa o máximo aceptado é de 2 w/Kg).
Vendo os resultados publicados temos que non se pode asegurar que un fabricante ou outro teña as menores emisións, xa que cada terminal acada un resultado distinto. Así, os 4 móbiles que emiten máis radiación serían de Motorola (o V195s, Slvr L6, Slvr L2 e W385) e o segundo con menos emisións sería o Razr V3 do mesmo fabricante (cun SRA de 0,14 w/Kg).
Entre os móbiles con menos emisións tamén podemos destacar o LG KG800 (con só 0,135 w/Kg), o Nokia 9300 (cun SAR de 0,21) , o Nokia N90 (0,22) ou o Samsung SGH-G800 (0,23).
Todos estes datos poden ser orientativos para os consumidores, aínda que non está demostrado que o uso de móbiles poida ser prexudicial para a saúde.