A Asociación PuntoGal estará presente no encontro internacional de ICANN no Cairo

Unha delegación da Asociación PuntoGal participará no Cairo na 33ª edición do encontro internacional de ICANN no que se abordarán distintos aspectos sobre o sistema de dominios na Internet, como serían os procesos para a aceptación de candidaturas para novos dominios xenéricos de primeiro nivel, ou sexa, no que podería ser o proceso que daría lugar á creación dun dominio para a lingua e cultura galegas.
A xuntanza terá lugar entre os días 2 e 7 de novembro, e os representantes da Asociación PuntoGal participarán activamente nas sesións de traballo das que sairá a guía definitiva para a presentación de solicitudes de novos dominios. Agárdase que o texto esixirá que as novas solicitudes deberán vir de organizacións que demostren a súa capacidade organizativa, técnica, operativa e financeira para levar a bo porto as operacións propias da posta en marcha e mantemento dun dominio de primeiro nivel, ao que habería que sumar o pago dunha taxa para cubrir os custos do proceso de avaliación de candidaturas, que podería chegar a ser de 185.000 dólares por solicitante (cantidade que podería ir reducíndose segundo vaian avanzando os procesos de aprobación de novos dominios de primeiro nivel).