A UDC entrega os VII Premios Galicia de Innovación Junior 2009

O reitor da Universidade da Coruña, José María Barja, xunto co director xeral de I+D+i, Ricardo Capilla, van ser os encargados de presidir, mañá xoves 25 de xuño, o acto de entrega dos VII Premios Galicia de Innovación Junior deste ano, que a entidade académica concede aos mozos e mozas de toda a Comunidade con espírito emprendedor.
O acto terá lugar ás 10:15 horas no salón de actos da Facultade de Ciencias da UDC e nel proxectarase un vídeo de presentación dos traballos gañadores e faráselles entrega dos galardóns aos premiados. Ao rematar o acto, os preto de 100 rapaces e rapazas asistentes realizarán unha visita aos laboratorios do Servizo de Apoio á Investigación (SAI) da Universidade da Coruña e a empresas do viveiro da UDC, para coñecer de primeira man o traballo que realizan investigadores e emprendedores.
Estes galardóns convócanse anualmente para estimular o espírito creativo e a capacidade innovadora entre os mozos e mozas de entre 12 e 18 anos. Este ano, os alumnos e alumnas procedentes de centros de toda Galicia, presentaron a concurso un total de 168 ideas de novos produtos, servizos ou procesos. Entre as ideas presentadas seleccionáronse as de 16 escolares e equipos que tiveron que artellar unha maqueta ou o desenvolvemento da súa idea.