Galicia sae ben parada no último informe do Observatorio Nacional das TIC

O Observatorio Nacional das Telecomunicacións e da Sociedade da Información (ONTSI) vén de presentar o segundo Informe anual La Sociedad en Red 2008 no que se inclúe o sector das Tecnoloxías da Información, e os seus resultados non podían ser máis satifactorios para o noso país ao revelar que Galicia con 908 empresas, o 4,4% do total das empresas TIC do conxunto de España, “xa é a sexta comunidade autónoma pola súa contribución a este segmento do sector produtivo”, por detrás do País Vasco, Andalucía, Valencia, Cataluña e Madrid, que con un 29,9 por cento de empresas dedicadas ás TIC encabeza a listaxe.
O sector dos contidos e servizos dixitais en Galicia está formado, segundo vimos de comprobar a través do devandito informe, por 126 empresas, que representan o 4,2% do total de compañías deste sector no conxunto do Estado.
No tocante ao nivel de emprego no eido das TIC, o propio OGSI, que da conta da nova na súa web, revela que ao longo do pasado ano en Galicia este sector superou os 13.500 traballadores, contribuíndo substancialmente á mellora da economía global.
Por outra banda, o volume de negocio das empresas TIC que posúen todos os seus establecementos no territorio de Galicia, situouse en 2007, segundo informa o Observatorio, “por riba dos 2.500 millóns de euros, cun crecemento do 35,5% no período 2006-2007”.
O volume de negocio das empresas TIC, engaden, “segue procedendo maioritariamente da súa actividade no mercado galego e apenas o 26,4 da súa facturación corresponde a clientes emprazados fóra de Galicia”.
O estudo realizado polo ONTSI para o sector específico TI en 2008, cifra en máis de 20.800 empresas as que se ocupan das actividades relacionadas co sector das tecnoloxías da información; empresas que superan os 60.000 millóns de euros en facturación e que xeran máis de 300 mil postos de traballo, “preto dun 11 por cento máis que en 2007”.