Convocada a I edición dos Premios Gradiant, que recoñecen a mellor tese doutoral aplicada ao sector das TIC

No marco da décimo-cuarta edición da Noite Galega das Telecomunicacións, que terá lugar o vindeiro venres 6 de novembro non paradisiaca Illa da Toxa, un lugar onde xa vén sendo habitual a celebración desta gala, o Colexio Oficial e a Asociación de Enxeñeiros de Telecomunicación de Galicia (COETG-AETG), van facer entrega dos premios Gradiant, que as devanditas entidades, en colaboración coa Fundación Centro Tecnolóxico das Telecomunicacións de Galicia outorgan á Mellor Tese Doutoral aplicada ao Sector TIC 2009.
Este Premio, que ten como principal obxectivo recoñecer a excelencia dunha tese de doutoramento aplicada ao sector das Tecnoloxías da Información e as Comunicacións (TIC), convócase por primeira vez este ano, e está dotado con 2000 euros.
Aproveitando que a Illa da Toxa se convertirá por unha noite nun punto de encontro único e inigualable dos profesionais das telecomunicacións, das novas tecnoloxías da comunicación e da sociedade da información, a concesión deste premio supón unha excelente tarxeta de presentación para o galardoado ou galardoada, que poderá codearse coas personalidades máis destacadas deste eido, e incluso chegar a algún acordo de colaboración a medio e longo prazo nalgunha das entidades alí presentes.
Á hora de conceder o galardón, o xurado valorará sobre todo, a transferencia de coñecemento ao sector das TIC, xustificada de maneira obxectiva mediante patentes, licenzas ou a través de diferentes contribucións demostrables a produtos ou servizos.
Coa concesión deste premio, os seus organizadores pretenden fomentar a realización de teses de doutoramento “como vehículo de xeración de coñecemento e recoñecer a aqueles investigadores das universidades galegas que teñan completada a súa tese de doutoramento neste eido”.
A convocatoria do premio, cuxo prazo de recepción de memorias remata o vindeiro 5 de outubro, está aberta a todas aquelas persoas que teñan defendido a súa tese nalgunha das tres universidades galegas durante os anos 2008 e 2009.
Nas bases da convocatoria (arquivo en formato PDF) está dispoñible máis información sobre o procedemento para presentar as candidaturas ao premio.