Manuel Bragado confirma que Xerais publicará 2 novelas en formato electrónico antes de rematar o ano

O director de Edicións Xerais, Manuel Bragado, vén de ser entrevistado por César Lorenzo para A Nosa Terra, co gallo do 30º aniversario da súa editorial, e aproveitando a ocasión para confirmar que en poucas semanas sairán á venda 2 novelas que estarán dispoñibles simultaneamente en papel e en formato dixital, e que serán Sete palabras de Suso de Toro e Dime algo sucio de Diego Ameixeiras, tendo Xerais coma obxectivo chegar a un catálogo de 50 libros electrónicos no verán de 2010, incorporando tanto novidades coma recuperando títulos descatalogados.
Bragado destaca que o sector do libro dixital está en constante cambio, pero asegurando que a edición galega está lista para o cambio, pois xa leva mudando nos últimos anos e así coma «os programas de autoedición obrigaron a unha profunda reforma (..) agora vivimos outra, na que primarán os contidos, o que esixe outras canles de colaboración entre todos os implicados no sistema literario galego».
No tocante á piratería, Manuel Bragado non cre que os libros vaian seguir os mesmos pasos que a música, e considera que o máis destacable do libro dixital será a democratización da edición.