Arteixo Telecom expón a súa experiencia co Fondo Tecnolóxico Europeo

A Tecnópole estalles a abrir camiños aos encontros empresariais idóneos para o fluxo de coñecemento: aqueles nos que participan compañías de éxito actual con outras de éxito vindeiro. Un exemplo disto é a xornada celebrada hoxe mesmo no dito parque empresarial e na que concorreron empresarios e responsables dos centros tecnolóxicos da Tecnópole. O obxectivo: coñecer de primeira man a traxectoria empresarial seguida por Coren e Arteixo Telecom, esta última unha das firmas TIC máis punteiras dos panoramas galego e español. Máis polo miúdo, do que se tratou foi de subministrar ás firmas da Tecnópole todo tipo de datos de valor sobre a experiencia das devanditas dúas compañías co Fondo Tecnolóxico, instrumento financeiro posto en marcha pola Unión Europea co fin de impulsar o desenvolvemento e que para o caso galego constitúe a achega duns 405 millóns de euros para o período 2007-2013, investimento que na súa maior parte aínda está sen adxudicar.
Máis polo miúdo, o Fondo Tecnolóxico é unha partida especial de fondos FEDER da UE dedicada á promoción da I+D empresarial.
O Centro para o Desenvolvemento Tecnolóxico e Industrial (CDTI) foi designado para xestionar boa parte deste Fondo, “priorizando o apoio a proxectos realizados por grupos de empresas por medio de tres novas modalidades de proxectos: integrados, de cooperación tecnolóxica entre empresas e de cooperación interempresas nacional”, informa a Tecnópole. Sinalar ademais que as axudas poden chegar a cubrir o 75% do total do orzamento do proxecto.