O presidente da CMT considera que «non está xustificado» que Google teña que compartir ingresos con Telefónica

As polémicas declaracións de César Alierta asegurando que buscadores coma Google deberían compartir os seus ingresos coas operadoras de telecomunicacións coma Telefónica veñen de atopar outro detractor, Reinaldo Rodríguez, presidente da Comisión do Mercado das Telecomunicacións (CMT), quen nunha entrevista ao diario Expansión asegurou que «ninguén nega que se poidan dar servizos diferentes a prezos diferentes, pero o debate estase expoñendo con argumentos do tipo de ‘como vostede ten un negocio que apóiase nas miñas infraestruturas, quero unha parte do seu negocio’. Por esta razón Acesa cobraría das gasolineiras e das compañías de autobuses. Iso non está xustificado».
Rodríguez tamén ve pouco realista a opción de Telefónica, pois non imaxina «cómo se podería obrigar a un operador de Internet a pagar máis do que xa está a pagar. ¿Cómo vas a obrigar a Google a pagar un prezo superior ao que xa paga? ¿Va filtrar a súa rede, coma ocorre en China?».
O presidente da CMT tamén alertou de que «estase desviando o debate da neutralidade de rede, que antes era un dereito básico de liberdade de expresión, e agora estase a expor en termos dos intereses dos operadores», o que podería facer perigar o que hoxe entendemos por Internet. Tamén defende que é preciso manter regulado o mercado das telecomunicacións, para protexer á sociedade, pero este tipo de medidas non serían aplicables á Internet, por ser un mundo «moi inestable» no que «as posicións de dominio gáñanse e pérdense con moita rapidez».
No tocante ás redes de nova xeración, Reinaldo Rodríguez sostén que os operadores están a conter os seus investimentos porque aínda non existe unha demanda que poidan rendibilizar o seu elevado custo.