Symantec prepara produtos de seguridade para iPhone e Android

Compañías coma Symantec teñen moi ligada a súa marca con aplicacións de seguridade informática de escritorio, pero ante a proliferación de dispositivos móbiles queren levar o seu negocio máis aló, o que nun principio non parece atender a unha demanda existente, pero que podería chegar a crearse de entender os usuarios que os datos almacenados no móbil merecen certo nivel de seguridade, de aí que Symantec estea a preparar Norton Everywhere, unha nova liña de produtos destinada a terminais con Android e aos de Apple.
En xuño van lanzar unha versión de proba de Norton Smartphone para Android, e permitirá que os usuarios poidan bloquear o eliminar os seus terminais remotamente a través dunha mensaxe de texto (en caso de perda ou roubo) e incluso incorporará proteccións contra o código malicioso ou o bloqueo de chamadas.
Tamén preparan unha beta de Norton Connect para móbiles, que permitirá o acceso a servizos coma o Norton Online Backup, así coma tamén de Norton DNS, servizo que protexe aos usuarios do phishing, código malicioso e spyware ao facer pasar todo o tráfico a través dos servidores de DNS de Symantec (de xeito que bloquearía o acceso a espazos perigosos).
Todo este tipo de medidas poderán resultar de interese para particulares e empresas, pois cada vez os móbiles son máis uns pequenos ordenadores, de xeito que a preocupación pola súa seguridade podería aumentar considerablemente nos vindeiros anos.