Google podería lanzar un tablet con Chrome OS en novembro

Aínda que non é ningún segredo o desenvolvemento do sistema operativo Chrome OS por parte de Google, orientando o seu uso a dispositivos portátiles, dende Downloading Squad concretan máis os detalles sobre o seu lanzamento, asegurando que a propia Google está a preparar un dispositivo tipo tablet para esta nova plataforma de software, que levaría a súa marca coma xa aconteceu co móbil Nexus One, pero que desta volta non sería distribuído directamente pola compañía do buscador, senón que sería a operadora Verizon a que comercializaría o equipo a partir do 26 de novembro, ou sexa, que estaría dispoñible no Black Friday (día no que comeza oficialmente a tempada de Nadal nos EE.UU. e no que é toda unha tradición sorprender ao público con impresionantes ofertas puntuais).
Tamén comentan que o dispositivo venderíase xunto a un contrato de datos móbil, de xeito que estariamos ante un tablet subvencionado (algo que non acontece actualmente co iPad) o que podería incrementar o seu atractivo, pois algúns usuarios poderían incluso adquirilo de balde (ou case).
Do que non dan detalles é do hardware que conformará o novo tablet, pero parece razoable pensar que integrará tecnoloxía nVIDIA Tegra 2, pantalla múlti-táctil cunha resolución de 1.280 x 720 píxeles (para poder amosar vídeos a 720p), 2 Gb de RAM, 32 Gb de memoria interna, Wi-Fi, Bluetooth, 3G, GPS, webcam e lector de tarxetas de memoria, o que permitiríalle competir seriamente co iPad de Apple.