Nokia presenta novos teléfonos móbiles

Entre hoxe e mañá celébrase a Nokia World 2010, encontro no que o fabricante finlandés de móbiles dá a coñecer algúns dos seus novos produtos, o que nesta xornada traduciuse no anuncio oficial dos terminais Nokia C6 (nova versión do terminal xa existente), C7 e E7, que veñen todos con Symbian^3, aínda que o seu lanzamento parece ensombrecido polas informacións relativas á reestruturación da cúpula directiva da compañía.

Dende Nokia aseguran controlar o 40% do volume de mercado dos smartphones, aínda que tal forza non parece ter a importancia económica de compañías coma Apple e RIM, que conseguen maiores marxes de beneficios co iPhone e as BlackBerry respectivamente, de aí que Nokia teña que seguir actualizando o seu catálogo para ofrecer terminais interesantes para un público ao que cada vez resúltalle máis difícil chegar.
Os móbiles presentados hoxe parten do novo Nokia C6, con pantalla táctil AMOLED de 3,2 polgadas, lector de tarxetas de memoria microSD de ata 32 Gb e un prezo libre de 260 euros; e do Nokia C7, con pantalla capacitiva AMOLED de 3,5 polgadas, 8 Gb de memoria interna (ampliable mediante tarxetas microSD de ata 32 Gb) e un prezo libre de 335 euros. Ambos veñen con cámara de 8 Mpíxeles e están fabricados en aceiro inoxidable e cristal.

Para un mercado corporativo presentaron o Nokia E7, que pode lembrarnos ao clásico Nokia 9000 Communicator e que presenta un teclado QWERTY deslizante, pantalla táctil de 4 polgadas, 16 Gb de almacenamento interno, cámara de 8 Mpíxeles con gravación (e edición) de vídeo a 720p e saída HDMI. Incorpora Nokia Messaging táctil con Microsoft Exchange ActiveSync e incluso permite editar presentacións de PowerPoint sobre a marcha (así coma outros documentos ofimáticos). O seu prezo libre será de 495 euros e chegará ao mercado no derradeiro trimestre do ano.

Vídeo de presentación do Nokia C6

Avance do Nokia C7

O Nokia E7 quere conquistar ao público profesional