O presidente de Ineo salienta nunha entrevista o valor da competitividade a través da colaboración

A edición en papel de La Voz de Galicia do pasado domingo incluíu entre outros contidos unha completa entrevista con Jorge Cebreiros, presidente de Ineo, quen avalía no xornal galego as diferentes formas de poñer en xogo unha estratexia empresarial de competitividade a través das novas tecnoloxías da información e o espírito innovador. Segundo conta Cebreiros, estes ingredientes unidos a unha vontade de colaborar con outras empresas e con centros tecnolóxicos e universitarios, constitúen a fórmula para non perder terreo no xogo económico internacional, sendo esta aplicable ao sector que representa Ineo, o das TIC, pero tamén a tódolos restantes. A entrevista en La Voz é ademais un achegamento directo á natureza e aos obxectivos da asociación Ineo, que foi posta en marcha en 2006 ao abeiro dun plan europeo da Zona Franca e que conta hoxe con máis 80 empresas asociadas, amais do apoio das nosas tres universidades, as dúas caixas, o Banco Sabadell, o Consorcio da Zona Franca de Vigo, a Confederación de Empresarios de Galicia ou o Colexio de Enxeñeiros de Telecomunicacións.
A asociación, explica Cebreiros perante o xornal galego, constitúe arestora un exemplo de traballo contra a crise económica, dende os seus piares máis básicos e desenvolvido por compañías de tódolos tamaños, abranguendo este traballo a comunicación directa e inmediata de tódolos logros obtidos. Dito doutro xeito: para Ineo non abonda con facer fronte común contra o parón produtivo e conseguilo, senón que cómpre informar aos demais de cómo se pode facer. “A única maneira de remontar a crise e adaptármonos a sectores tan cambiantes é a través da colaboración e o esforzo común”, informa Jorge Cebreiros perante La Voz, ao que engade: “Se queremos competir a nivel internacional temos que ir da man e colaborar con outros axentes sociais como centros tecnolóxicos, universidades ou asociacións de empresarios; é o que nós estamos a facer”. Segundo apunta, o sector TIC foi o único que medrou o ano pasado en investigación e máis en desenvolvemento, procesos que son a aposta básica para asegurar un futuro empresarial.