Microsoft amplía o seu programa de doazón de software a entidades sen arela de lucro

Microsoft anunciou esta semana que vai ampliar a cantidade de recursos que decote doa ás comunidades e entidades sen arela de lucro. Esta estratexia da firma, que segundo conta a propia compañía xa supuxo o envío de recursos informáticos por valor de 3.900 millóns de dólares, estenderase agora para que “máis entidades poidan acceder a estas doazóns en calquera intre que o precisen”. A liña social de Microsoft, posta en marcha en 1998, é asumida en España por Technosite, socio da multinacional e responsable da xestión destas achegas, o control do fluxo de pedidos, a distribución e o seguimento. En España, en virtude deste acordo, xa se realizaron doazóns a máis de 1.200 entidades por un valor económico que vai alén dos 19 millóns de euros, informa Microsoft.
Como canle principal para fornecer de axudas tecnolóxicas ás ONG estatais, púxose e marcha a páxina web proxectodono, onde xa se están a aplicar as ampliacións e as melloras devanditas, ampliacións que se dirixen a abranguer máis entidades potencialmente beneficiarias e a minimizar o tempo de espera dos produtos informáticos. A este respecto, Carlos de la Iglesia, director de Desenvolvemento Corporativo de Microsoft Ibérica, comenta que “aínda que axudamos a un gran número de entidades non lucrativas, queremos estender esa axuda a máis organizacións; os cambios que anunciamos estes días están dirixidos a estender e máis a facilitar o acceso ao noso software a un meirande número de entidades”.