Google mercará a división móbil de Motorola por 12.500 millóns de dólares

Nos últimos meses varias compañías (principalmente Microsoft e Apple) emprenderon acción legais contra fabricantes que instalaban Android nos seus móbiles acusándoos de infrinxir varias das súas patentes, polo que Google tivo que tomar cartas no asunto para defender aos seus socios, o que tivo unha consecuencia un tanto sorprendente, xa que a compañía de Mountain View anunciou que pechou un acordo para a adquisición de Motorola Mobility por un total de 12.500 millóns de dólares, o que suporía unha plusvalía do 63% sobre o prezo das accións da compañía o pasado venres.
Dado que Motorola é un dos moitos fabricantes que comercializan dispositivos con Android dende Google aseguran que non van prexudicar ao resto dos seus socios adquirindo a división móbil de Motorola (que continuará a operar de xeito separado, coma un titular máis da licenza Android), senón que só buscan fortalecer a plataforma Android, o que tamén debería de beneficiar a LG, HTC, Samsung, Sony Ericsson…
Motorola levaba apostando por Android como sistema operativo nos seus smartphones dende 2008, e tamén fora a compañía que fabricou o tablet estandarte de Android 3.0 (o Motorola XOOM).
A operación de adquisición de Motorola Mobility por parte de Google está pendente da aprobación dos reguladores da competencia e dos accionistas da compañía, polo que espérase a súa consolidación a finais de ano ou primeiros do que vén.