IBM presenta unha tecnoloxía para axudar na busca de aparcamento nas cidades

Se algún día lles dese aos condutores, oxalá que non, por contar as horas que pasan ao longo da súa vida buscando aparcamento e obter unha cifra final, tolearían. Para evitar este tipo de incidentes, xa sabemos o que hai que facer: usar máis bus, máis bici ou, tamén, máis perna. Se, con todo, seguimos coa teima de usar o coche, porque colle a posibilidade de que teñamos a cabeza máis dura có granito de Porriño, semella que as novas tecnoloxías nos poden botar unha man. Así nolo conta IBM, que está a presentar unha tecnoloxía para axilizar a procura de sitio para estacionar, cousa cada vez máis complicada, por outra banda, nos centros das nosas cidades.
Segundo o informe que acompaña a presentación destes desenvolvementos da multinacional, estes procesos ao volante, os de buscar sitio, non só xeran un importante volume de gases contaminantes (posto que temos prendido o coche para nada) senón que provocan o 30% dos atascos que sofren decote as cidades. Asemade, infórmase, preto de seis de cada dez condutores déronse por vencidos polo menos unha vez e deixaron de buscar aparcamento, habendo unha parte importante de usuarios que remataron por iniciar unha discusión con outro condutor.
Co fin de pórlle remedio a todo isto e facilitar a circulación dos vehículos, o tráfico fluído, IBM asinou un acordo de colaboración con Streetline, empresa centrada no desenvolvemento e despregue de solucións de aparcamento con sede nos EE UU. A partir disto, déuselle corpo a un servizo para o estacionamento, patentado por Sreetline, que detecta a presenza dun vehículo a través dunha rede de sensores sen fíos situados nas prazas de aparcamento individuais. Estes datos póñense a disposición do condutor en tempo real, a través da ferramenta Parker, unha aplicación de balde para teléfonos intelixentes que xa podemos ver nas tendas en liña de iTunes e Android.
“A combinación das ferramentas de xestión e análise avanzado da información de IBM”, sinala a multinacional, “cos datos obtidos dos sensores de aparcamento de Streetline permitiralles aos organismos locais tomar decisións máis intelixentes sobre os sistemas de transporte urbanos e comprender mellor os patróns de estacionamento dos condutores”.