Un estudo revela que as aplicacións de negocios teñen moito que mellorar en facilidade de uso

Agora que xa están as ferramentas, un dos principais eidos de traballo do sector da programación, ben sexa programación pechada ou libre, é favorecer ata onde sexa posible a usabilidade dos seus produtos entre a meirande cantidade de xente, tendo sempre en conta que o común dos usuarios, aínda que proveñan de empresas TIC, non teñen porqué ter uns coñecementos avanzados en materia tecnolóxico-dixital. Segundo un estudo feito pola consultora IDC e promovido por IFS, menos dun terzo das firmas consideran que as súas aplicacións de negocios son intuitivas e doadas de empregar.
O estudo, que conclúe que os provedores de sistemas de planificación de recursos de tipo empresarial (ERP) deben mellorar o software para atender do mellor xeito posible a crecente demanda, desenvolveuse nunha serie de compañías de Estados Unidos, India e Europa.
En total, avaliáronse sete sectores produtivos diferentes, verificándose o uso e a flexibilidade das ferramentas empregadas, achegándose, entre outras, estas conclusións:
· Arredor do 29% dos enquisados opinan que as aplicacións son fáciles de empregar.
· Máis da metade consideran que algunhas das tarefas son unha perda de tempo cando utilizan as aplicacións de negocios.
· Practicamente a metade espera que se leven a cabo importantes trocos no negocio ao longo dos vindeiros 12-24 meses, e un 82% dos enquisados cre que será preciso cambiar as súas aplicacións empresariais para facer fronte a estes cambios.
· Un 44% considera que as aplicacións de negocios teñen un impacto negativo na axilidade de negocio.
Outra das conclusións que achega a investigación é que os profesionais son hoxe en día máis esixentes co que cae nas súas mans en materia de recursos informáticos de índole corporativa. É dicir: xa non nos conformamos que unha cousa sexa útil, precisamos que o tempo de uso sexa o máis reducido posible e a rendibilidade máxima, co obxectivo de que se asegure o medre e a produtividade.