O papel das redes sociais na procura de democracia no mundo árabe, a debate este venres en Santiago

Younes M´Jahed, un dos máis prestixiosos especialistas do mundo árabe no que se refire á incidencia das novas tecnoloxías e das redes sociais nas recentes revoltas deste contorno xeográfico, estará este venres 21 en Santiago para falar, precisamente, do potencial da nova comunicación e do novo xornalismo na loita a prol da democracia. Younes M´Jahed, que vén á nosa terra convidado pola Asociación de Xornalistas de Santiago (APSC) en colaboración coas fundacións Araguaney e Carlos Casares, é hoxe en día vicepresidente da Federación Internacional de Xornalistas, presidente do Sindicato Nacional da Prensa Marroquí e vicepresidente da Comisión de Liberdades da Unión Árabe de Xornalistas. A cita, como dixemos, será en Compostela, no salón do Hotel Meliá-Araguaney, a partir das 20.00 horas.
O relatorio desenvolverase baixo o seguinte epígrafe: Os actuais cambios no mundo árabe; influencia das redes sociais e o xornalismo nas revolucións da primavera de 2011. Younes M´Jahed, segundo informan os organizadores do evento, traballa a día de hoxe no xornal marroquí Al Ittihad Ichtiraki II, e ata hai pouco foi o correspondente da axencia española EFE en Marrocos. Asemade, é autor dun bo número de publicacións sobre dereitos humanos no seu país -no que estivo na cadea durante o reinado de Hassan II- e unha manchea de investigacións sobre liberdade de comunicación.
No acto estarán tamén os presidentes das Fundación Araguaney e Carlos Casares, Ghaleb Ibrahim e Gustavo Garrido, respectivamente, e o presidente da APSC, Luís Menéndez, quen fará a presentación de Younes M´Jahed e moderará o posterior coloquio.