AGASOL e sete empresas galegas amosarán na Coruña o potencial do software libre no noso tecido produtivo

A Facultade de Informática acollerá a vindeira semana unha serie de actividades destinadas a pór de manifesto a máis que completa listaxe de vantaxes que as empresas de programas abertos teñen xa a disposición de todo o noso tecido produtivo, sexa cal sexa o seu tamaño e dedicación. Estamos a falar das Xornadas de empresa e software libre, un evento a desenvolver os días 8 e 9 de novembro e que veñen da man da Oficina de Software Libre da propia universidade. Como dixemos, do que se trata é de favorecer o contacto entre as nosas firmas subministradoras de software aberto e as receptoras destes recursos, potencialmente todas. Amais, tamén se tratará de achegarlles claves de futuro, sobre futuras iniciativas empresariais, aos vindeiros profesionais do sector TIC.
Con este obxectivo, estarán presentes no evento, apoiando e divulgando, entidades como AGASOL, que abrirá o martes día 8 o programa de actividades, e empresas a título individual como Igalia, Corunet, Icarto, Imatia, Quobis, Tagen Ata e Redegal. O exemplo da asociación AGASOL e das ditas empresas, máis as múltiples posibilidades de negocio e oportunidade para as novas empresas a través do software libre, serán o cerne principal duns encontros dirixidos aos futuros profesionais das TIC e ao público en xeral que queira coñecer máis sobre as aplicacións de software libre, informa a devandita asociación empresarial galega dende a súa web.
As xornadas servirán, polo tanto, para levar da man aos asistentes cara o miolo da realidade do software libre e os seus múltiples potenciais na xestión da información e da comunicación da empresa, amosando casos concretos e prácticos destas aplicacións entre empresas punteiras da nosa terra.
As xornadas desenvolveranse entre as 10h e as 13.30h na Aula de graos da Facultade de Informática da UDC. Aínda é posible formalizar a inscrición a través do formulario disposto para tal fin na web da Oficina de Software Libre da Universidade da Coruña.