Google Chrome supera ao Firefox a nivel mundial

Os últimos datos a nivel mundial sobre o uso de navegadores web por parte de StatCounter veñen de facer historia, pois aínda que o Internet Explorer continúa a ser líder (co 40,65%), os seus principais competidores están a intercambiarse as súas posicións, xa que o Chrome de Google conseguiu chegar ao 25,49% da cota de mercado, superando o 25,31% de Firefox da Fundación Mozilla, conservando estes navegadores unha ampla distancia con respecto ao Safari (5,94%) e o Opera (1,8%).
Non só é significativo que o Google Chrome superase ao Firefox, senón que tamén resulta destacable que o Internet Explorer e o Firefox estean perdendo cota de mercado. No caso do navegador de Microsoft xa era algo habitual, pero no caso do Firefox vese que chegou ao seu teito (pouco máis do 32%) e agora ten que facer fronte á captación de usuarios por parte do navegador de Google, que convence coa súa velocidade e seguridade.
Nas últimas semanas dende StatCounter tamén publicaron outros datos especialmente relevantes, como que no mes de outubro rexistraron por primeira vez que o número de equipos con Windows 7 superaban ao veterano Windows XP, mentres que o Windows Vista continúa estancado, resultándolle imposible suceder ao XP como estaba previsto.