BIC Galicia formará aos emprendedores que participen en Vindeira Capital Network 2012

A Consellería de Economía e Industria, a través da súa entidade dependente BIC Galicia, vaise encargar de achegarlle formación de balde aos e ás emprendedoras que participen na vindeira edición de Vindeira Capital Network, un evento orientado á captación de investimentos no eido das TIC, que se presentou hoxe en Santiago e que terá lugar no mes de maio.
Trátase dunha iniciativa promovida por empresas galegas vinculadas ao sector tecnolóxico que se vén desenvolvendo dende hai un par de anos e que ten como obxectivo reunir a investidores, analistas e especialistas para “moldear o futuro do investimento neste sector en Galicia, a partir dunha estrutura de capital risco estable para este sector”.
En poucas palabras, trátase de atopar financiamento para proxectos TIC galegos en desenvolvemento que teñen boa proxección e contan con posibilidades de éxito, pero que non teñen o pulo económico necesario para saír adiante e consolidarse.
Na presentación do evento participou a directora xeral de BIC Galicia, Maite Cancelo, xunto con representantes do sector TIC, da Universidade de Santiago de Compostela e de Videira Capital Network, que consideran “imprescindible impulsar unha estratexia de innovación acertada para consolidar en Galicia unha industria TIC sostible”.