A USC terá representación dupla na final do Campus Innovation Award

Máis de 1.500 profesionais procedentes de vinte países e representantes dun cento de start-ups de toda Europa xuntáronse hoxe na localidade francesa de Reims, onde se está a celebrar unha nova edición do European Forum for Innovative Starts-ups (Innovact), un evento que serve de punto de encontro anual entre emprendedores e redes europeas implicadas no desenvolvemento de novos proxectos empresariais, e que facilita o contacto entre ámbolos dous sectores.
Ata alí tamén se achegaron dous investigadores da USC, que cos seus proxectos representarán á Universidade na final do Campus Innovation Award, un concurso que se celebra no marco deste foro da innovación.
Falamos de Ana Isabel Gómez, doutoranda do grupo de Microóptica e Óptica GRIN da USC, que presentou a concurso un novo sistema conformador de feixe que converte o feixe láser non uniforme noutro cunha distribución de intensidade uniforme ou de “chistera”.
O outro representante galego, Manuel Gómez, presentou, pola súa banda, un sistema de posicionamento 3D en tempo real sobre estruturas óseas para cirurxía dental, aínda que extensible a outros procedementos cirúrxicos.
Segundo explicou Gómez para o xornal da USC, esta ferramenta dota ao instrumental cirúrxico dun posicionar 3D en tempo real “que permite ao profesional identificar a posición precisa do instrumental en cada momento, evitando deste xeito danos en tecidos sensibles sobre os que inicialmente non hai que intervir”. Inicialmente, o dispositivo dirixirase á cirurxía dental, aínda que Manuel Gómez considera que “será aplicable a outros tipos de cirurxía, especialmente para endoscopias, e a outros campos onde teoricamente hai que intervir a cegas”.
Esta proposta xa resultou premiada en 2010 no Concurso de Ideas Empresariais Innovadoras da USC, e con ela Gómez pretende facerse tamén co I premio neste certame de innovación internacional, que lle outorga 5.000 euros ao proxecto gañador e 1.500 euros aos 2º e 3º clasificados.