Orange comezará a vender o seu smartphone Intel Inside no Reino Unido

Orange anunciou hoxe un novo móbil con Android que destaca por apostar por un procesador con tecnoloxía Intel, o Orange San Diego, que estará dispoñible dende o 6 de xuño no Reino Unido, aínda que é de agardar que chegue a España pouco despois como xa fixeron outros terminais que o operador francés vendía baixo a súa marca.
Este smartphone coñecíase ata o momento como Orange Santa Clara, e busca ofrecer prestacións avanzadas a un prezo asumible. Funciona cun procesador Intel Atom Z2460 a 1,6 GHz, soporta HSPA+, 1 Gb de RAM, cámara de 8 Mpíxeles capaz de disparar a refoladas de 10 imaxes por segundo e grava vídeo a 1.080p, conta cun almacenamento interno de 16 Gb, tecnoloxía NFC, saída HDMI, Bluetooth 2.1, GPS, compatibilidade coa tecnoloxía móbil de voz HD e, por se iso non fose suficiente, a súa pantalla de 4,03 polgadas ten unha resolución de 600 x 1.024 píxeles.
O seu prezo en prepagamento será de 199,99 libras esterlinas (incluíndo 250 Mbytes de datos durante 12 meses) e por xeito limitado poderá adquirirse de balde cunha permanencia de 24 meses a un contrato de 15,50 libras esterlinas/mes (a tarifa Delfín británica). Sen dúbida uns prezos moi agresivos para un terminal de boas prestacións, aínda que o feito de apostar por tecnoloxía Intel nun dispositivo con Android 2.3 (actualizable en breve a Android 4.0) podería non ser o máis axeitado no que a compatibilidade de software se refire.