Microsoft e Nokia uníronse hoxe para dar a coñecer ao mundo os novos móbiles da familia Lumia, dos que xa se filtrara bastante información nos últimos días, e que finalmente non decepcionaron. Os novos terminais con Windows Phone 8 serán o Lumia 920 e o Lumia 820, e aparte de contar cun sistema operativo innovador e con moito potencial, queren destacar especialmente pola súa cámara, que conta coa tecnoloxía PureView, que permite tomar boas imaxes incluso con pouca luz e tamén fai uso dun sistema de estabilización óptico da imaxe que reduce considerablemente o desenfoque e o movemento.
No tocante ao software, estes novos móbiles veñen con Nokia Mapas, aplicación que pode funcionar sen acceso á Internet e que integra navegación e realidade aumentada, aínda que para esta última función resulta moito máis axeitado Nokia City Lens, que pretende ser a aplicación que achegue a realidade aumentada ás masas (conseguindo unha popularidade que Layar non está a ser capaz de acadar).
Con respecto ás cores, o Nokia Lumia 920 venderase en amarelo, vermello, gris, branco e negro, mentres que o Nokia Lumia 820 estará dispoñible en amarelo, vermello, gris, azul claro, púrpura, branco e negro. Chegarán a finais de ano en versión HSPA+ e LTE con prezos e datas de lanzamento aínda por determinar.
A tecnoloxía PureView promete ser o principal reclamo para os novos móbiles da gama Lumia
Presentación en vídeo do Nokai Lumia 920
O Nokia Lumia 820 explicado en vídeo
O sistema de estabilización de imaxe da cámara do Nokia Lumia 920 posto a proba en vídeo
